നല്ല സിനിമകള് എന്ന ലക്ഷ്യത്തില് വിട്ടുവീഴ്ചയില്ലാതെയാണ് ഇക്കുറിയും കേരള രാജ്യാന്തരമേള സജ്ജമാക്കിയിരിക്കുന്നതെന്ന് ചലച്ചിത്ര അക്കാദമി ചെയര്മാന് കമല് പറഞ്ഞു. മേളയുടെ നടത്തിപ്പ് ലളിതമായിട്ടാണെങ്കിലും സിനിമകളുടേയോ തീയേറ്ററുകളുടേയോ കാര്യത്തില് യാതൊരും വിട്ടുവീഴ്ചയും ചെയ്തിട്ടില്ല. അടുത്തകാലത്ത് ഇറങ്ങിയിട്ടുള്ള മികച്ച സിനിമകളാണ് മേളയില് പ്രദര്ശിപ്പിക്കുന്നത്. ലോകോത്തര നിലവാരമുള്ളവയും വിശ്വപ്രസിദ്ധ സംവിധായകരുടേയും ചിത്രങ്ങളാണ് ലോകസിനിമാ വിഭാഗത്തില് ഉള്പ്പെടുത്തിയിരിക്കുന്നത്. ജാഫര് പനാഹി, ഗൊദാര്ദ് തുടങ്ങിയ പ്രശസ്ത ചലച്ചിത്രകാരന്മാരുടെ ചിത്രങ്ങള്ക്കൊപ്പം മേളയിലെ താരം എന്ന് മലയാളികള് വിശേഷിപ്പിക്കാറുള്ള കിം കി ദക്കിന്റെ ഏറ്റവും പുതിയ സിനിമയും മേളയില് പ്രദര്ശിപ്പിക്കുന്നുണ്ട്. പ്രളയ ദുരന്തത്തിന്റെ പശ്ചാത്തലത്തില് ആഘോഷങ്ങള് ചുരുക്കിയാണ് ഇത്തവണ മേള നടത്തുന്നത്. ഡെലിഗേറ്റ് ഫീസായും സ്പോണ്സര്ഷിപ്പിലൂടെയും സമാഹരിക്കുന്ന പണം ഉപയോഗിച്ചാണ് ചലച്ചിത്ര മേള സംഘടിപ്പിക്കുന്നതെന്നും കമല് വ്യക്തമാക്കി.
സോഷ്യല് മീഡിയയിലെ ട്രോളുകള് ഭയന്ന് പ്രശസ്തര് പല വിഷയങ്ങളിലും സ്വതന്ത്രമായി അഭിപ്രായം പറയാന് മടിക്കുന്നതായി നടിയും സംവിധായികയുമായ നന്ദിതാദാസ്. സോഷ്യല് മീഡിയ ഒരു മികച്ച പ്ലാറ്റ്ഫോമാണെങ്കിലും സ്വതന്ത്രമായ അഭിപ്രായങ്ങള് പലതരത്തിലുള്ള വിമര്ശനങ്ങളേയും നേരിടേണ്ടിവരുമെന്നും അവര് പറഞ്ഞു. രാജ്യാന്തര ചലച്ചിത്രമേളയോടനുബന്ധിച്ചുള്ള ഓപ്പണ് ഫോറത്തില് പങ്കെടുക്കുകയായിരുന്നു അവര്. ജനാധിപത്യത്തിലെ പൊതുയിടങ്ങള് നഷ്ടപ്പെടുകയാണ്. അത് വീണ്ടെടുക്കാന് സ്വതന്ത്ര ചിന്താഗതിക്കാര് ഒരുമിക്കണം. അഭിപ്രായസ്വാതന്ത്ര്യത്തിന് വേണ്ടി പൊരുതണമെന്നും അവര് വ്യക്തമാക്കി. ജനാധിപത്യത്തില് സെന്സര്ഷിപ്പിന് സ്ഥാനമില്ലെന്ന് മലയാളി സംവിധായകന് ജയന് ചെറിയാന് പറഞ്ഞു. അവകാശങ്ങള് നഷ്ടപ്പെടുമ്പോഴുള്ള നിശബ്ദത ഫാസിസ്റ്റുകള് മുതലെടുക്കുകയാണ്. ഭരണകൂടത്തിനെതിരെ സംസാരിക്കാനുള്ള അവകാശത്തെ സംരക്ഷിക്കണമെന്നും അദ്ദേഹം പറഞ്ഞു. കെ.എം കമല് മോഡറേറ്ററായിരുന്നു. അക്കാദമി ചെയര്മാന് കമല്, ചെലവൂര് വേണു എന്നിവര് പങ്കെടുത്തു.
Comments
Post a Comment