23-ാമത് രാജ്യാന്തര ചലച്ചിത്രമേളയിലെത്തിയ പ്രതിനിധികള്ക്ക് ഹര്ത്താല് ദിനത്തില് ഡി.വൈ.എഫ്.ഐ.യുടെ വക ഉച്ചഭക്ഷണം. ചാല, പാളയം, വഞ്ചിയൂര് ഏര്യാ കമ്മിറ്റികള് ശേഖരിച്ച 1500 ഭക്ഷണപൊതികളാണ് ടാഗോര്, കൈരളി, ശ്രീ, നിള തിയേറ്ററുകളിലായിരുന്നു ഭക്ഷണവിതരണം. ഡി.വൈ.എഫ്.ഐ സംസ്ഥാന ട്രഷറര് എസ്.കെ. പ്രജേഷ് ഭക്ഷണ വിതരണം ഉദ്ഘാടനം ചെയ്തു. ജില്ലാ സെക്രട്ടറി കെ.പി പ്രമോദ്, ബി. വിനീത് തുടങ്ങിയവര് പങ്കെടുത്തു.
സോഷ്യല് മീഡിയയിലെ ട്രോളുകള് ഭയന്ന് പ്രശസ്തര് പല വിഷയങ്ങളിലും സ്വതന്ത്രമായി അഭിപ്രായം പറയാന് മടിക്കുന്നതായി നടിയും സംവിധായികയുമായ നന്ദിതാദാസ്. സോഷ്യല് മീഡിയ ഒരു മികച്ച പ്ലാറ്റ്ഫോമാണെങ്കിലും സ്വതന്ത്രമായ അഭിപ്രായങ്ങള് പലതരത്തിലുള്ള വിമര്ശനങ്ങളേയും നേരിടേണ്ടിവരുമെന്നും അവര് പറഞ്ഞു. രാജ്യാന്തര ചലച്ചിത്രമേളയോടനുബന്ധിച്ചുള്ള ഓപ്പണ് ഫോറത്തില് പങ്കെടുക്കുകയായിരുന്നു അവര്. ജനാധിപത്യത്തിലെ പൊതുയിടങ്ങള് നഷ്ടപ്പെടുകയാണ്. അത് വീണ്ടെടുക്കാന് സ്വതന്ത്ര ചിന്താഗതിക്കാര് ഒരുമിക്കണം. അഭിപ്രായസ്വാതന്ത്ര്യത്തിന് വേണ്ടി പൊരുതണമെന്നും അവര് വ്യക്തമാക്കി. ജനാധിപത്യത്തില് സെന്സര്ഷിപ്പിന് സ്ഥാനമില്ലെന്ന് മലയാളി സംവിധായകന് ജയന് ചെറിയാന് പറഞ്ഞു. അവകാശങ്ങള് നഷ്ടപ്പെടുമ്പോഴുള്ള നിശബ്ദത ഫാസിസ്റ്റുകള് മുതലെടുക്കുകയാണ്. ഭരണകൂടത്തിനെതിരെ സംസാരിക്കാനുള്ള അവകാശത്തെ സംരക്ഷിക്കണമെന്നും അദ്ദേഹം പറഞ്ഞു. കെ.എം കമല് മോഡറേറ്ററായിരുന്നു. അക്കാദമി ചെയര്മാന് കമല്, ചെലവൂര് വേണു എന്നിവര് പങ്കെടുത്തു.
Comments
Post a Comment